Arestado ang job order employee sang Sagay City Government matapos magpaniro sang isa ka gwardiya sa Purok Yarda Dos, Barangay Paraiso, Sagay City, Negros Occidental.
Ginkilala ang biktima nga si Alyas Aguilar, isa ka gwardiya kag ang suspetsado ang ginkilala nga si Alyas Ricky, 55 anyos kag residente sang Purok Hillside, Barangay Poblacion 2, Sagay City, Negros Occidental.
Sa interview sang Bombo Radyo Bacolod kay Police Lt. Col. Alvimar Flores, hepe sang Sagay City Police Station, estable na ang kondisyon sang gwardiya nga natiruhan sang suspetsado.
Suno kay Flores, ang biktima upod ang paryente sini ang nagainum sang makahulubog nga ilimnon sa atubang balay sang suspek.
Ginhagad sang paryente sang biktima si Alyas Ricky nga magtapungulay kag bangud may dugay na nga indi pagintsindihanay ang magtimbang nga bahin, ini ang nagresulta sa pagtiro sa biktima.
Ginhingagaw dala sa ospital ang biktima kag sa karun nagarecover na.
Suno kay Flores sa inisyal nila nga imbestigasyon ang gingamit sang suspek sa pagtiro sa biktima ang caliber 45 pistol.
Nadakpan ang job order employee kag ginapreparar na ang kaso nga ipasaka sa iya paagi sa inquest proceedings.
