Tuman ang pagpasalamat kag kalipay sang author sang hagna nga House Bill No. 6731 nga pagpatukod sang Bacolod City General Hospital nga napirmahan na ini kag nangin layi kahapon.
Suno kay Bacolod City Lone District Congressman Greg Gasataya, napuno sang kalipay ang tagipusuon sini nga napasar na gid man ang ginatrabaho sang Bacolodnon nga makaangkon sang kaugalingon nga ospital ang syudad sang Bacolod sa pagpasar bilang Republic Act No. 11564.
Ginapasalamatan man sini nga nangin madasig ang proseso kag tatlo lang ka semana humalin sang mapasar sa Senado, ginpirmahan na ni Presidente Rodrigo Duterte ang layi.
Ini bangod nakita sang presidente ang importansya sang ginaduso nga layi.
Ginmanduan naman ang Department of Health (DOH) nga ilakip sa ila budget ang pondo sa pagpatukod sang Bacolod City General Hospital.
Ginalauman naman ni Gasataya nga mapasulod sa pagahumanon nga 2022 General Appropriations Act ang pondo sa pagpatukod sang ospital.
Ginpaathag naman sang kongresista nga ang pagpatukod ang pagapondohan sang National Government.
Samtang pasalig man sini nga nagcommit na ang National Government nga kun mahuman na kag matapos ang ospital, magabulig man gihapon ang mga ini sa inisyal nga operasyon sang ospital kag I-turn over sa syudad.
Dugang pa sini nga mangin aplikable man sa ospital ang Universal Philhealth Law, nga makabulig sa operational expenses sang Bacolod City General Hospital.
Suno kay Gasataya, sang pagfile palang sini sang hagna sang 2019, ginpangabay na sa iya sang DOH nga pangitaan sang lugar kun sa diin ipatukod ang proyekto.
Apang suno diri, mabudlay na nga magpangita sang pwesto sa sentro sang syudad bangod magluwas sa balor sang duta, magutok naman diri gani wala na sang tyansa para sa posibilidad sang expansion sang ospital sa palaabuton.
Dako ang tsansa nga sa medyo gwa na nga bahin sang syudad mapatukod ang Bacolod City General Hospital apang pasalig sini nga mangita sila sang lugar nga accessible gihapon sa mga Bacolodnon.
