Ginpasar na kahapon sa 3rd and final reading sang Senado ang hagna natuhoy sa pagpatukod sang Bacolod City General Hospital.
Suno kay Bacolod City Lone District Congressman Greg Gasataya, natapos na ang madugay na nila nga ginahulat nga pag-aprubar sang hagna nga ginsuguran pa sang 1st term sini sadtong 2016.
Ginrefile ini ni Gasataya sang Hulyo 1, 2019.
Ginapasalamatan sang kongresista nga naaprubahan na ini sa karun sa Senado unanimously ukon sa boto nga 23-0.
Ginpasalamatan man ni Gasataya ang tanan nga katapo sang Senado ilabi na si Senate President Vicente Sotto III; Senator Juan Miguel Zubiri, nga amo ang nagfile sang counterpart sang hagna sa Senado; Senator Christopher “Bong” Go, nga Senate Committee on Health; kag si Senate Minority Leader Franklin Drilon.
Samtang, kasubong man nga ginapasalamatan sang Kongresista ang mga kaupdanan sini sa kongreso sa nangin madasig man nga pag-aprubar sang hagna sang nakaligad nga tuig.
Ginpakigbahin man sini nga wala mahuman ang hagna nga wala ang partisipasyon sang Department of Health (DOH) kag mga opisyales sang Bacolod City Government.
Nagalaom kag ginapangamuyo man sini nga masuguran na sa masunod nga tuig ang pagpatukod sa ospital.
Suno kay Gasataya, matapos nga pirmahan ni Presidente Rodrigo Duterte, ginalauman sini nga mapondohan na sa 2022 National Budget ang nasambit nga proyekto.
Suno sa kongresista, madugay na nga handum sang mga Bacolodnon nga makatukod sang kaugalingon nga ospital ang ciudad.
