Gin-aprubahan na sang Senado sa 3rd and final reading ang hagna nga magahatag sang gahom kay President Ferdinand Marcos Jr. sa pagsuspender ukon pagbuhin sang fuel excise tax agud mapahagan-hagan ang impact sang tuman nga pagtaas sang presyo sang produktong petrolyo.
17 ka Senador ang nagboto pabor sa Senate Bill No. 1982, nga nagapahanugot sa Presidente nga suspendihon ukon buhinan ang fuel excise tax sa tion nga magdangat ukon maglapaw sa US$80 per barrel sa isa ka bulan ang average nga presyo basi sa Mean of Platts Singapore.
Sa pihak nga bahin, ang counterpart sini nga House of Representatives, ang naghatag naman sang lain nga kondisyon, antes mapatuman ang automatic suspension ukon reduction sang fuel excise tax.
Sa House Bill No. 8418 nga na-aprubahan sa Kamara sang Lunes, kinahanglan nga magdeklarar anay ang Presidente sang State of National Emergency ukon Calamity agud majustify ang suspensyon ukon pagbuhin.
Bangod gincertify na nga urgent ni Presidente Marcos ang hagna, ginlaktawan na sang Senado ang 3-day rule kag gilayon nga ginpasar sa 3rd and final reading matapos mapasar sa 2nd reading.
Luwas diri, gincertify man nga urgent ang Senate Bill No. 1965, ukon hagna nga maga-amyendar sa Biofuels Act of 2006, agud matugutan ang Presidente nga temporaryo nga masuspender ang mandatory nga paggamit sang locally-sourced biofuels, kun ang presyo sang blended gasoline kag diesel engine fuels ang magsaka sang lima ka porsyento pasaka kumpara sa pure gasoline ukon diesel engine fuels.
