Hagna nga magahatag sang P1,500 cash assistance sa mga minimum wage earners, ginapasalamat sang labor group

Gin-abi abi sang secretary general sang General Alliance of Workers Association (GAWA) sa hagna nga ginaduso ni Senator Sherwin Gatchalian nga mahatagan sang P1,500 nga cash assistance kada bulan ang mga minumum wage earners.

Sa interview sang Bombo Radyo Bacolod kay Wennie Sancho, welcome development para sa labor sector ang ginaduso sang senador.

Suno kay Sancho, dako ini nga bulig sa mga mamumugon sa tunga sang krisis kag pagmahal sang mga nagapanguna nga balaklon sa karun.

Ginpahayag man sini nga kun madayon ini mangin hero si Gatchalian sa mga mamumugon bangud antes pa man ang krisis sa Middle East madugay na ang mga ini nga nagaagunto.

Panawagan sini nga mahatagan sang gilayon nga economic relief ang mga mamumugon.