Gin-aprubahan unanimously sang House of Representatives sa third kag final reading ang hagna nga nagamando sa Department of Labor and Employement (DOLE) nga maghatag sang oportunidad sa trabaho sa mga edad 60 anyos pasaka.
Sa House Bill 10985 ukon Employment Opportunities for Senior Citizens and Private Entities’ Incentives, ginapanawagan man sa tanan nga ahensya sang gobyerno kag mga pribado nga sektor nga magplastar sang employment program nga makapromote sang general well-being sang mga senior citizens kag maseguro ang access sa employment opportunities para sa mga kwalipikado, may kapasidad kag interesado pa nga magtrabaho.
Ang hagna ang nagahatag man sang adisyunal nga insentibo sa pribado nga negosyo nga magabatun sang senior citizens.
Ang mga private entities nga magabatun sang senior citizen nga trabahante ang entitles sa dugang nga deduction sa ila gross income, nga katumbas sang 25 porsyento sang kabug-usan nga balor nga ginabayad para sa salaries, wages, benefits, kag trainings para sa mga senior citizens, subject sang provision sa idalom sang Section 34 sang National Internal Revenue Code, nga gin-amyendahan, kun ini ang makapadayun sa trabaho sa indi magnubo anom ka bulan.
Ang hagna ang nagahatag man pahanugot sa mga ahensya sang gobyerno kag private entities nga makahire sang kwalipikado nga senior citizens para sa consultancy kag iban pa nga kaangay nga arrangement, kasubong man ang paghatag sang mas dako nga benepisyo ukon mas maayo nga working conditions, bisan sa terms of employment sang senior citizens nga mas mataas sangsa minimum requirements nga nakasaad sa layi.
Ang DOLE, kaupod ang iban pa nga mga ahensya sang gobyerno kaangay sang Technical Education and Skills Development Authority (TESDA), Department of Trade and Industry (DTI) kag Civil Service Commission (CSC) ang ginamanduan man sang hagna nga mag-assess, design, implement, monitor kag evaluate sang training programs nga makahatag sang nagakaigo nga skills kag kaayuhan ukon livelihood support para sa mga senior citizens
Ang mga government agencies and instrumentalities, kalakip ang government-owned and controlled corporations (GOCCs), local government units (LGUs), kag government hospitals, ang ginadumilian man nga magkolekta sang fees kag charges gikan sa mga senior citizens nga nagapangita sang trabaho kaangay sa magakuha sang police clearance certificate, National Bureau of Investigation (NBI) clearance, barangay clearance, medical certificate gikan sa public hospital magluwas sa mga balayran kag charges sa laboratory tests kag iban pa nga medical procedures nga kinahanglan sa paghatag sang medical certificate, birth certificate, marriage certificate, proofs of Identification kag iban pa nga mga dokumento nga gina-issue sang gobyerno nga ginapangita sa mga aplikante sa trabaho.
