Luyag ni Senator Sherwin Gatchalian nga mapabaskog ang papel sang lokal nga panguluhan sa sektor sang edukasyon kadungan sang ginaduso nga pag-amyendar sa Local Government Code agud madugangan ang financial capacity sang local government units (LGUs).
Suno kay Gatchalian, ang reporma ang isa ka oportunidad agud mapasanyog ang kalidad sang edukasyon sa ila tagsa ka nasakupan.
Sa idalom sang 21st Century School Boards Act (Senate Bill No. 53), tinutuyo nga mapasangkad ang komposisyon kag mga hilikuton sang Local School Boards agud mangin mas epektibo ang ila papel sa pagdumala sang edukasyon sa lokal nga lebel.
Ginaduso sa hagna ang paggamit sang mga metrics sa pag-usisa sang performance sang mga eskwelahan kag LGUs, lakip na ang partisipasyon sang mga estudyante, mga dropout kag out-of-school youth rates, achievement scores, kag ang pagtukod sang mga child development centers.
Katuyuan sini nga masiguro nga ang mga programa kag polisa sa edukasyon ang may yara sang konkreto nga basehan.
Kabahin man sang proposal ang paggamit sang Special Education Fund (SEF), sa diin sa idalum sini, ang pondo mahimo gamiton para sa sweldo sang mga manunudlo kag mga non-teaching personnel, honoraria kag allowance para sa serbisyo nga lapaw na sa regular nga oras sang pagtrabaho.
