Ginakalipay ni Negros Occidental Governor Eugenio Jose “Bong” Lacson ang nabaton nga mensahe nga pirmahan na ni President Ferdinand “Bongbong” Marcos Jr. ang Negros Island Region bill agud mangin opisyal nga layi alas-2:00 karon sa hapon.
Sa mensahe sang gobernador kasunod sang 126th Philippine Independence Day celebration, ginpakigbahin sini nga siya ang nakabatun na sang mensahe para sa ceremonial signing sa Malacañang kag ini ang ginpamangkot kun sin-o nga opisyal sang probinsya ang luyag magtambong.
Pasalig sang gobernador nga siya ang gilayon man nga mapagwa sang official statement matapos ang pagpirma sa Presidente.
Paathag sini nga indi lamang Negros Occidental ang nagakalipay, kasubong man ang Negros Oriental kag Siquijor bangod ini ang madugay na nila nga ginapangabay.
Matapos sini, madamo pa sila sang kinahanglan nga asikasuhon kalakip na ang pagplastar sang mga Regional Offices kag Regional Development Council.
Pahayag sini nga dako na nga achievement ang pagpirma sang Presidente agud mangin layi ang Negros Island Region.
Magatambong man si Bacolod City Mayor Alfredo “Albee” Benitez sa pagpirma sang Presidente sa Negros Island Region bill agud mangin opisyal na nga layi karun sa hapon.
Suno kay Benitez, dako ini nga butang para sa probinsya sang Negros Occidental, Negros Oriental kag Siquijor nga mangin kabahin sa isa na lamang ka rehiyon.
Suno diri, 60 tubtob 90 ka adlaw posible nga mabalay na ang Implementing Rules and Regulations (IRR) para mangin operational ang bag-o nga rehiyon.
Sa karun, pagatun-an pa ang pagtukod sang mga regional offices para sa pagsanyog sang Negros Island Region.
