Ginahulat pa sa karon kun sin-o ang magauyat sang committee on local government sa Lower House agud nga matalakay ang hagna nga magatunga sang Bacolod sa duha ka distrito.
Sa interview sang Bombo Radyo kay Bacolod City Lone District Congressman Greg Gasataya, gintalana na kuntani ang hearing para sa hagna apang bangud gin-appoint si Congressman Rex Gatchalian bilang secretary sang Department of Social Welfare and Development, nagahulat pa sa karon sin-o ang igabutang bilang chairperson sang committee on local government sa Lower House.
Suno kay Gasataya, target kuntani nga matunga ang Bacolod sa duha ka distrito antes ang 2025 elections agud nga may duha na ka tiglawas sa Kamara de Representantes sa amo nga tinion.
Suno kay Gasataya, makabulig ini sa dugang nga economic development bangud madugangan ang pondo para sa mga proyekto sa Bacolod paagi sa mga ahensya sang gobyerno nga mangin implementing agency sang mga ini.
Nagapati ini nga long overdue na ang redistricting sang ciudad bangud sadto pa man, ginaduso na ang pagtunga sini bangud nagadamo ang populasyon.
Halin sang tuig 2016, ginduso naman ni Gasataya ang redistricting apang wala ini nakakuha sang resolusyon nagikan sa Sangguniang Panlungsod sang Bacolod nga nagasuporta sa hagna.
Samtang igatugyan naman sa desisyon sang barangay kag sang ciudad kun magahimo sang dugang nga bag-o nga barangays kun natunga na ang Bacolod.
