Gin-aprubahan na sang House committee on energy ang hagna nga nagaamend sang Downstream Oil Industry Deregulation Act samtang nagapadayon ang pagsaka sang presyo sang gatong.
Sa online meeting, gin-aprubahan sang committee ang hagna nga ginatawag Oil Deregulation Law, “subject to form and style.”
Una na nga ginpahayag ni acting Cabinet Secretary Melvin Matibag nga diskusyunan sang Department of Energy kag Department of Finance kaupod si Presidente Rodrigo Duterte ang pagpanawaan nga suspendihon ang fuel excise tax kasunod nga asod-asod nga pagsaka sang presyo sang gatong.
Suno sa iya, kun makigkita na ang Presidente sa iya mga Gabinete, makabaton ang publiko sang mas solid nga desisyon kag mas compelling nga sabta tuhoy sa oil subsidy.
Gindugang man sini nga ginpahayag ni Duterte nga posible magapanawag sila sang emergenyc session sa Kongreso agud maaddress ang nagapadayon nga problema.
Nagapati man si Matibag nga indi lamang short-term solution ang kinahanglan kundi long-term gani tion na para sa Kongreso nga ireview ang oil deregulation law kag kun nagaserbi pa ini para sa interes sang publiko.
Sa idalum sang layi, nga mas kilala bilang Downstream Industry Deregulation Act, ginhukas ang government control agud mabuligan ang mga oil companies nga mas mangin competitive sa ila supply kag presyo sang produktong petrolyo.
