Welcome para kay Bacolod Mayor Albee Benitez ang hagna nga ginfile sang tatlo ka mga kongresista nga nagikan sa Negros Occidental agud mahatagan sang prangkisa ang Negros Electric and Power Corporation (NEPC).
Ang nasambit nga kompaniya ang magaoperate sang electric power distribution system sa ciudad sang Bacolod, Silay, Talisay, kag Bago kag sa banwa sang Murcia kag Don Salvador Benedicto.
Sa press conference, kahapon, ginpahayag ni Benitez, sa pag-intsindi sini manugexpire na ang prangkisa sang CENECO, gani kaangay sang ginhimo sang MORE power sa Iloilo, maapply man ang NEPC sang franchise agud nga may kasiguraduhan kag legal foundation ang nasambit nga kompaniya.
Nahibaluan nga ang NEPC konektado sa MORE power nga naga operate sa syudad sang Iloilo.
Suno kay Benitez, iya man ginpabalo si Congressman Greg Gasataya angot sa hagna kag nagpahayag man sang pagsuporta diri.
Suno sa alkalde, nakabaton sila sang pila ka proposal pero ang NEPC amo lamang ang kompaniya nga nagpagwa sang kwarta ukon naginvest na sa una pa lamang nga adlaw.
Nagapangabay man ini sa National Electrification Administration (NEA) nga mahatagan sang kasiguruhan ang gin-aprubahan nga Joint Venture Agreement agud makaumpisa na ang kompaniya sang modernization programa nga ila ginpromisa.
