Gin-aprubahan na sang Senado sa second reading ang hagna nga may tinutuyo nga magtukod sang Negros Island Region (NIR) sang Miyerkules, Disyembre 13.
Sa idalom sang Senate Bill (SB) 2507, ang proposed NIR ang pagalakipan sang probinsya sang Negros Occidental kalakip na ang Bacolod City, Negros Oriental, kag Siquijor.
Ang hagna ang may tinutuyo nga mapasanyog ang delivery sang basic government services sa Negros Island paagi sa establishment sang regional government offices kag pagpromote sang decentralization agud nga mabakod ang local autonomy.
Sa idalom man sang SB 2507, ang technical working group (TWG) ang magadihon sang roadmap para a institutional arrangements sang NIR, arrange sang organizational development requirements para sa development planning kag investment programming, kag magdihon sang mapa sang provision sang public services sa proposed region.
Ang technical working group ang pagabug-usan sang mga tiglawas sang National Economic and Development Authority (NEDA), Department of the Interior and Local Government (DILG), Department of Budget and Management (DBM), Office of the Governor sang mga probinsya, kag ginpili nga miyembro sang House of Representatives sang mga probinsya.
Samtang ang DILG ang magaserbe nga secretariat.
Sang tinalikdan nga Marso, gin-aprubahan sang Kamara unanimously sa third kag final reading House Bill 7355 sa pagestablisyar sang NIR.
