Liwat na nga ginfile ni Congressman Greg Gasataya ang House Bill 297 nga nagatuyo nga tungaon ang syudad sang Bacolod sa duha ka mga distrito.
Suno kay Gasataya, ginfile ang hagna sang Hulyo 1 sa idalum sang 19th Congress.
Nagalaom siya nga makapasar ang Sangguniang Panlungsod sang Bacolod sang resolusyon nga naga endorso sa amo nga hagna.
Madumduman, na file na sadto ni Gasataya ang ini nga hagna sa kongreso sang 2016 apang wala madayon bangud wala sang endorsement sang konseho.
Ginpahayag ni Gasataya, nga wala sang pagbag-o sa kaundan sang hagna nga iya damlag lang gin file.
Ginpaathag man ni Gasataya, nga kwalipikado ang syudad nga tungaon sa duha ka distrito base sa kadamuon sang populasyon sang syudad kag dako ini nga bulig sa tion nga may duha ka congressional districts ang syudad.
Sa idalum sang redistricting bill, mangin duha ang kongresista, isa ang alkalde, isa ka bise alkalde, kag tag walo ang mga konsehal sa kada distrito.
