Gin-aprubahan sang Senado sa third and final reading ang Senate Bill No. 2387 ukon ang lima ka tuig nga termino sang mga opisyal sang Barangay kag Sangguniang Kabataan (SK), sa boto nga 13-5-0.
Sa nasambit nga hagna nga gin-file ni Senator Francis “Chiz” Escudero, may yara sang bag-o nga electoral cycle kag maga-resulta ini sa pag-postpone sang natalana kuntani nga Barangay at Sangguniang Kabataan Elections (BSKE) sa Nobyembre.
Katuyuan sang ginpropose ni Escudero nga mas mangin organisado, pat-od, kag maathag ang sistema sa local governance agud indi liwat-liwat ang pagkansela sang eleksyon kada magdungan ini sa pungsudnon nga botohay.
Apang, ginpamatukan naman ini sang pila ka mga senador kaangay nanday Senator Tito Sotto kag Joel Villanueva, nga nagasiling nga ang liwat nga pagkansela sang BSKE ang mahimo paglapas sa Konstitusyon kag mag-uyang sang halos P8 billion nga gingasto sang Comelec para sa paghanda sa eleksyon sini nga tuig.
Napasar naman sa third reading ang kapareho nga hagna sa House of Representatives (House Bill No. 10971), kag natalana na ini nga ipaidalom sa bicameral conference committee antes isumiter sa Malacañang para sa pirma ni President Ferdinand Marcos Jr.
