Wala pa sang opisyal nga statement, apang nagatawganay na ang pila ka mga business organizations may kaangtanan sa pagpasar sa third and final reading sa House of Representatives sang hagna sa P200 wage increase.
Sa interview sang Bombo Radyo Bacolod kay Metro Bacolod Chamber of Commerce and Industry chief executive officer Frank Carbon, sila ang wala pa makasapol gani wala pa sang official statement ang MBCCI.
Apang gincontact naman sini ang iban pa nga miyembro sang business sector.
Palarehas ang tindog sang mga ini nga disaster ang padulongan sang ginahimo sang mga Senador kag Kongresista.Nahibaluan nga antes paman mapasar sa Kamara ang P200 wage increase nga hagna; una na nga may napasar nga P100 wage increase sa Senado.
Nagapati si Carbon nga ang pagduso ang smokescreen lamang ukon cover-up sa bilyon bilyon nga balor nga ginkuha sang gobyerno sa mga social services.
Halimbawa sini ang ginbuhin sa pondo para sa edukasyon, healthcare, imprastraktura kag agrikultura kag iban pa, amo man ang mga utilities kag airports nga ginapadalagan na lamang sa mga pribado nga kompanya bangod wala na sang budget ang gobyerno.
Suno kay Carbon, sa pagsarurot sang ekonomiya bangod sa kahimuan sang gobyerno, luyag sang mga ini nga ang mga negosyante amo ang masolbar.
Dugang pa sini nga wala man nagkonsulta sa ila ang mga kongresista kag senador kag hinali nalang nga nagpasar sang hagna para sa wage hike.
Pahanumdom ni Carbon nga sa pagsaka sang P200 nga minimum wage, wala lamang natapos sa minimum wage earners ang ila obligasyon bangod kinahanglan man pasakaan ang iban.
Dugang pa sini nga sa pagsaka sa sweldo magasaka man ang kontribusyon sa benepisyo.
Suno kay Carbon, magasapol pa sila nga yara sa business sector agud madiskusyunan ang mga tikang nga himuon agud macounter ang plano nga pagpasaka sang P100 tubtob P200 sa minimum wages.
Pahanumdom sini nga inkaso dayunon, ini ang idugang man nila sa bili sang produkto ukon serbisyo, gani makahatag pa sang dugang nga kabudlayan sa mga pumuluyo.
Sa baylo nga pagpasaka sang sweldo, panawagan sini nga tutukan nga mapataas ang produksyon gikan sa kadutaan kag kadagatan agud makabangon ang ekonomiya sang pungsod.
