Aprubado na sa House Committee on Health ang House Bill 2686 nga nagaduso sang pagtukod sang Heart and Kidney Center sa ciudad sang Bacolod.
Suno sa pagpahayag ni Bacolod City Lone District Congresman Greg Gasataya sa ginpatigayon nga virtual session sa Kongreso kahapon, tinutuyo sang nasambit nga hagna ang pagbulig sa mga pumuluyo indi lamang sang Bacolod kundi subong man sa probinsya sang Negros Occidental lakip na ang Negros Oriental.
Suno kay Gasataya, isa sa inspirasyon sini amo ang isa ka constituent sa Bacolod nga indi makapadulong sa heart center sa Manila bangod sa ginapangatubang nga COVID-19 pandemic.
Gani, luyag gid sini nga matigayon ang pagpatukod sang Heart and Kidney Center bangud personal ini para sa iya.
Matapos ang pagdihon sang committee report sa plenaryo, ipasulod na ang hagna para sa pagbaton sini sa manubo nga panalgan sang Kongreso.
