Bisan nagsiga na kagab-i ang Halandumon Tower, gin-athag sang city engineer sa Bacolod nga wala pa maturn-over sang kontraktor ang amo nga proyekto sa city government.
Madumduman nga kadungan sang pagkomemorar sang ika-82 nga anibersaryo sang Bacolod Charter Day kahapon, liwat nga ginpasiga ang Halandumon Tower sa Dalan Gonzaga matapos ang masobra isa ka tuig nga napunder ang mga suga sini.
Sa interview sang Bombo Radyo Bacolod kay Engr. Allan Agbones, ginpahayag sini nga wala pa maturn-over sang kontraktor ang Halandumon Tower sa ciudad.
Nahibaluan nga nagligad nga tuig pa kuntani ini dapat nga iturn over sa ciudad apang nagkalapunder ang suga sang tower.
Samtang padayon nga ginakay-o ang mga suga, sang Enero 24, 2020, gin-arado naman ini sang isa ka itom nga SUV kun sa diin nagkalaguba ang concrete barrier kag scaffoldings sa palibot sang tower.
Yara sa P300,000 ang estimated damage sang aksidente kag ginbayaran ini sang Korean national nga nagadala sang salakyan.
Suno kay Agbones, under warranty pa sang kontraktor ang tower.
Pananglitan nga maturn-over na ini sa city government, may 1 year warranty pa ini.
Nahibaluan nga ang walo ka mga exterior towers nga octagonal shape ang nagasimbolo sang tubo nga ginakabig backbone sang Bacolod City kag probinsya sang Negros Occidental.
Madumduman nga Hunyo 2019 sang gin-inagurahan ang P4.8 million nga balor sang proyekto.
