Half-rice policy, ginalantaw nga liwat iduso sa mga restaurants ukon kalan-an bangod sa nagasaka nga food wastage

Ginalantaw sang Philippine Rice Research Institute (PhilRice) kag Department of Agriculture (DA) nga liwat nga iduso ang half-rice policy sa mga restaurants ukon kalan-an bangud sa padayon nga nagasaka nga food wastage ukon nausik nga mga pagkaon sa pungsod.

Sa data sang PhilRice, as of November 2024, ginpakita nga may 255,000 metric tons sang kan-on nga nausik kag may equivalent ini nga 19-20 kilos sa kada pamilya.

Suno sa PhilRice mahimo na ini kuntani makaon sang 2.79 million ka mga Pinoy kada tuig.

Dugang pa sang ahensiya, nagnubo na ini kun ikumparar sa 300,000 metric tons kada tuig ang nausik santo sa mga tinalikdan nga mga record apang mahimo pa ini nga mas mapanubo paagi sa pagpatuman sang half rice policy.