Nagdangat sa kapin sa P3,000,000 ang balor sang halit sang sunog nga nagluntad nga sunog sa residential area sa Purok Cordova, Barangay 18, Bacolod City, kahapon sang aga.
Sa interview sang Bombo Radyo Bacolod kay Fire Officer 2 Rolin Paulan, Acting Chief Fire Investigator sang Bacolod Fire Station, alas- 8:51 sang aga sang ila nabaton ang report kag sa pag-abot sa area, bangod nga kapin sa napulo na ka balay ang gintupok sang kalayo, nagdeklarar na sila sang 3rd alarm.
Alas- 9:26 sang nakontrol na ang kalayo kag alas- 10:14 sang nagdeklarar nga fire out.
21 tanan ka balay ang apektado kun sa diin 18 diri ang totally damaged kag tatlo ang partially damaged.
Suno kay Paulan, electrical in nature ang rason sa nagluntad nga sunog kun sa diin nagdangat sa kapin sa P3,000,000 ang balor sang halit.
Samtang, temporaryo naman nga nagtinir sa chapel ang mga biktima sang sunog.
Sa interview sang Bombo Radyo kay Punong Barangay Madeline Diaz sang Barangay 35, 47 ka mga pamilya ukon 144 ka mga indibidwal ang apektado sang sunog.
Suno diri, iban sa mga biktima nga wala sang nasaylohan ang temporaryo nga nagtinir sa chapel kag sila naman ang ginhatagan sang bulig.
