Masobra 6,000 nga mga Agrarian Reform Beneficiaries gikan sa Negros Island Region ang nakabatun na sang ila kaugalingon nga land titles.
Ini kadungan sa ceremonial distribution sang mga land titles, Certificate of Condonation with Release of Mortgage (CoCRoM) kag iban pa nga support services sa Bago City Coliseum nga ginpangunahan mismo ni Department of Agrarian Reform Secretary Conrado Estrella III.
Nagdangat sa 6,923 ka mga land titles ang napanagtag, balor P1.8 billion ang utang nga nacondone paagi sa CoCRoM kag balor P5.6 million naman ang ginturnover nga support services.
Sa speech sang tiglikom, ginpahanumdom sini nga sa pagpungko pa lamang ni President Ferdinand “Bongbong” Marcos Jr., ginmando na sini nga padasigon ang paghatag sang mga titulo sang duta.
Apang bangod sa pandemya, climate change, pagmahal sang abono kag mga farm inputs, nakita sang Presidente nga indi masarangan sang mga ARBs ang balayran.
Ginsugilanon ni Marcos ang mga mamalidha nga makahimo sang layi agud macondone ukon mapanas ang utang sa duta nga nangin madinalag-on sa pagpasar sang Republic Act 11953 ukon New Agrarian Emancipation Act.
Suno kay Estrella, sa pihak sang paghatag sang duta kag pagdula sang utang, wala pa makumporme si Presidente Marcos, gani ginpasalig sini nga ulanon pa sang support services ang mga ARBs.
Ang DAR ang magapakig-angot sa Department of Health, Department of Agriculture, Department of Labor and Employment kag Department of Migrant Workers.
Pasalig sini nga sila ang magatinguha nga mahatagan sang benepisyo sa ikaayong lawas ang mga ARBs, scholarship sang mga kabataan, kag trabaho sa pungsod ukon abroad.
