Halos dos mil ka mga boys scouts ang gin-evacuate gikan sa ila Jamboree camp sa Barangay E. Lopez, Silay City matapos ginbaha kasunod sang tayuyon nga pag-ulan halin sang kaagahon.
Nahibaluan nga nagapatigayon sang 7th Negros Occidental Invitational Council Jamboree and 3rd Council Rover Moot 2024 sang Boys Scout of the Philippines nga nagsugod sang Disyembre 25 nga magatakop sa Disyembre 30.
Sa interview sang Bombo Radyo Bacolod kay Silay City Mayor Joedith Gallego, kapin tres mil ang mga boys scouts nga nagpartisipar sa jamboree samtang halos dos mil naman ang na-evacuate gikan sa sub-camp nga nasudlan sang baha.
Paathag sang alkalde nga ang baha ang indi gikan sa suba kundi bangod sa tayuyon nga ulan halin sang kaagahon, nga na-untat kapin alas-9:00 na sang aga.
Napuslan naman sang mga boys scout ang ila survival skills kag wala sang nasamaran sa pagbaha.
Ang mga boys scouts ang temporaryo nga ginpatinir sa Brgy E Lopez National High School.
Pasalig ni Gallego nga sa karun, nagsubside na ang baha apang wala pa gihapon ginpabalik ang mga kabataan bangod malutak pa ang duta.
Suno sa alkalde, madamo sa mga kabataan ang wala sang masuksok bangod nagkalabasa ang mga bisti, kag sila ang nakahatag man sang panapton apang ini ang indi bastante para sa tanan.
Magapadayun pa ang nasambitan nga jamboree tubtob sa Disyembre 30.
