Halos katunga sang kabug-usan nga mga purok sa Barangay Singcang Airport, ciudad sang Bacolod ang ginbaha kahapon bangud sa tayuyon nga pag-ulan.
Suno kay Punong Barangay Rosinie Distrito, ginbaha ang Purok Sampaguita Uno, Dos kag Tres; Kalong-Kalong; Neptune; Mars kag sa tadlong sang Gaisano Grand Mall sa Dalan Araneta.
Nagpasalamat naman ini sa tanan nga rescuers nga nagbulig sa ila bangud may pila ka mga residente nga natrap bangud sa kataason sang tubig kag nagalapaw sa tamburong.
Masobra 100 naman ka mga residente ang nag-evacuate kag ginatos pa ang dapat nga ievacuate.
Gintinguhaan naman sang barangay nga gilayon sila nga mahatagan sang makaon para sa panyaga kahapon.
Suno kay Distrito, mahimo nga madamol ang ulan sa bukid kag nagdulhog ang tubig diri sa Bacolod.
Suno kay Susan Valle, 58 anyos, residente sang Purok Mars, Barangay Singcang Airport, naanod ang mga gamit bangud wala niya nahingagaw kuha.
Suno kay Valle, nagdesisyon sila nga magbiya sa ila balay kag nagkadto sa Dalan Araneta alas-10:00 kaina sang aga bangud nagsaka na ang tubig.
Suno diri, naanad na kuntani sila sa baha apang nagbiya gid ini sa ila balay bangud mataas na ang tubig.
