Ginkumpirmar sang presidente sang Progressive Alliance of Capitol Employees (PACE) nga halos tanan nga mga empleyado sang provincial capitol ang nakabaton na sang Service Recognition Incentive (SRI).
Sa interview sang Bombo Radyo Bacolod kay Renelo Lastierre, natigayon na nga mahatag ang P20 mil nga SRI sang mga capitol employees kag ini ang ginpasulod sa iya ATM.
Halos tanan nga empleyado sang probinsya ang nakakuha na apang iban nga sa malagyo nga ospital nga nakadestino ang kahapon lamang nakakuha.
Samtang, ginpahayag man ni Lastierre nga ginpakamaayo sang mga empleyado sa kapitolyo probinsyal nga wala nalang sang bugas agud wala na sang madamo nga reklamo bangud government to government ang proseso sang pagbakal sini gani pagakuhaon ini sa National Food Authority (NFA).
Suno diri, sabaylo nga bugas, magatutok nalang ang probinsya sa performance based bonus ukon PBB sang mga empleyado kun sa diin makabaton ang mga ini sang 65 percent sang basic salary.
Ginalantaw nga pinakamanubo nga mabaton sang empleyado ang P10 mil.
Natalana nga ipanagtag ang PBB subong nga bulan sang Enero.
Ginpasalamatan ni Lastierre kaupod ang mga empleyado sang kapitolyo si Negros Occidental Provincial Administrator Atty. Rayfrando Diaz, Negros Occidental Governor Eugenio Jose “Bong” Lacson kag ang Sangguniang Panlalawigan sang Negros Occidental nga gin-aprubahan ang PBB para sa empleyado sang probinsya.
Nagpanugyan man ini sa mga empleyado nga pareho niya nga magpangabuhi sang modest life kag maggasto sang nagakaigo kag balikan paagi sa pagserbisyo sang maayo ang mga incentive kag bonus nga nabaton sang mga ini.
