Halos tanan sa mga kandidato sa pagkabise-presidente sa 2022 Elections ang nagpahayag nga indi supisyente ang P200 kada bulan nga ayuda para sa mga pigado nga pamilya sa tunga sang nagasaka nga presyo sa produktong petrolyo.
Kadungan sini, lunsay ila nga ginduso ang suspension sang excise tax sa produktong petrolyo bilang mas impactful nga tikang patok sa pagsaka sang presyo.
Suno kay Senate President Vicente Sotto III, mas dako pa ang ginhatag sang Quezon City nga P1,000 nga ayuda sang sa P200.
Gindugang man sini ang kinahanglanon nga pasakaon ang minimum wage sa P1,000 para sa Metro Manila workers kag P600 tubtob P800 para sa mga provincial workers.
Pabor man ini sa pagsuspendi sang excise tax bangud nagapati ini nga mas maayo na lamang ang gobyerno ang mag-antos indi lang ang mga pumuluyo.
Nagapati naman si Senator Francis “Kiko” Pangilinan nga indi supisyente ang P200 nga ayuda kada bulan kag dapat maghimo sang tikang ang Executive branch sa pag-adoptar sang “liberal interpretation” sang Tax Reform para sa Acceleration kag Inclusion Law agud masuspendi sini ang fuel excise tax.
Suno sa iya, kun suspendihon ang fuel excise tax, P10,P6, P5 kada litro ang mabuhin kag mabatyagan gid ini sang mga pumuluyo.
Pabor man si Dr. Willie Ong sa paghukas sang excise tax sa produktong petrolyo kag kuryente.
Suno kay Ong, dapat nga suportahan ang agrikultura, food security kag magfocus sa renewable energy bangud mas barato ini.
Gindugang man sini nga kinahanglan nga magtipid kag kun pwede nga madamo sang bikelanes bangud wala sang gasolina gani mas maayo kun himuon nga walkable ang mga ciudad.
Gintawag naman ni anay lawmaker Walden Bello nga joke nga P200 monthly subsidy.
Suno kay Bello, daw kaangay nga ginainto lang ni Presidente Rodrigo Duterte ang mga pumuluyo bangud isa pa lamang ka adlaw, ubos na ang nasambit nga ayuda.
Liwat man ini nga nagpanawagan nga pasakaan ang daily minimum wage sa P750 agud mabuligan ang mga Filipino workers.
Suno naman kay Rizalito David, kinahanglan sang mas dako nga bulig agud makasurvive sa tunga sang nagamahal sang cost of living.
Suno sa iya, problema sa karun ang mentalidad sang gobyerno nga mas maayo na lamang ang may yara sang sa wala.
Suno diri, dapat man nga maghatag ang gobyerno sang financial aid sa mga magagmay nga negosyante agud mapakusog ang ekonomiya sang pungsod agud makahimo sang mga trabaho para sa mga pumuluyo.
Nagapati naman si Manny Lopez nga maayo na lang nga may ayuda sang sa wala.
Suno sa iya, dapat makadihon ang gobyerno sang austerity program, magdevelop sang sources sang renewable energy nagikan sa solar kag hydro kag makaangkon sang agresibo nga oil exploration initiative.
Suno naman kay Carlos Serapio, indi supisyente ang P200 kag dapat may yara sang bahin nga igahatag sa production kag sa nasambit ila nagakakita nga ginahatagan ang mga pumuluyo sang energy relief bangud ini ang padayon nga mapuslan sa kada adlaw kag kada bulan.
