Pasanyugon pa sang pamunuan sang 303rd Infantry Brigade sang Philippine Army ang pagbantay sa mga election hot spot areas sa probinsya sang Negros Occidental samtang nagahilapit ang local campaign period.
Sa interview sang Bombo Radyo Bacolod kay Brigadier General Inocencio Pasaporte, commander sang 303rd Infantry Brigade sang Philippine Army, may yara na sila sang listahan nga nabaton angot sa 18 ka mga areas of concern sa probinsya sang Negros Occidental.
Sa 18 ka mga lugar, 13 diri ang yara sa green category ukon low risk; isa ang sa yellow category; tatlo ang sa orange category kag apat ang yara sa red category.
Suno kay Pasaporte mas ginhugot pa sang mga suldado ang pagbantay sa probinsya ilabi na sa mga NPA perceived areas.
Suno diri nacontained naman nila ang NPA kag nakita man sang mga ini nga nagnubo na ang performance sang mga ini apang wala nagakampante ang militar.
Gina-antisipar man sang mga ini ang mahimo nga ubrahon sang NPA ilabi na sa pagpangilkil bangud ang piniliay ang oportunidad man agud nga makatipon sila para sa ila nga logistical needs gani ginpabaskog man sang mga otoridad ang ila nga security operations sa election hotspot areas.
Ginpahayag man ni Pasaporte nga mahimo man nga mag-init ang kampanya sang mga lokal nga kandidato ilabi na ang may yara sang mainit man nga rivalry sang mga kandidato gani mahimo man nga magbag-o ang mga natumod na nga areas of concerns apang nakadepende man sa mga kandidato.
