Nakarekober sang mga otoridad sang isa ka hand grenade kag armas-luthang sa Senior citizen nga tag-iya man sang illegal refilling station sang LPG canister nga ginserbehan sang warrant of arrest sang National Bureau of Investigation-Bacolod sa puluy-an sini nga nahamtang sa Purok Pedring, Barangay Estefania sa ciudad sang Bacolod, Martes nga adlaw, Agosto 18.
Ginkilala ang subject search warrant kay Bebing, lalaki, 61-anyos, kag residente sa nasambit nga lugar.
Sa interview sang Bombo Radyo Bacolod kay NBI- Bacolod Executive Officer William de Arca, una ginserbe nga search warrant kay Bebing nga may kaangtanan sa illegal nga pag-refill sang mga LPG canisters.
Suno kay de Arca, padayon pa ang ila pag-isip kun pila gid ang balor sang butane canisters ang ila nga nakumpiskar.
Nakadepende man sa mga brand companies sang single use butane canisters kun magapasaka sang kaso batok sa senior citizen.
Nakuhaan man ini sang isa ka hand grenade kag gina-alegar caliber .45 pistol nga may walo ka bala.
Suno kay de Arca, si alyas Bebing ang may ginapatubang nga reklamo sadto nga paglapas sa Republic Act 7610 ukon Special Protection of Children Against Abuse, Exploitation and Discrimination Act, grave threat, homicide, kag iban pa.
Suno diri, ang NBI-Bacolod ang mapasaka sang kaso batok diri kag sa nasambit man nga talatapan ini ikustodiya bangud ang ahensya ang nakadakop sa iya.
