Opisyal na nga ginlunsyar kaina sang aga ang Handog ng Bombo Radyo at Star FM sa Bacolod Masskara Festival 2024 “Dance Showdown” competition.
Ang umpisa sang registration period ang ginlunsyar ni Bombo Daniel Lecciones, station manager sang Bombo Radyo Bacolod kaina.
Ang registration period para sa mga dance groups gikan sa Bacolod City kag Negros Occidental ang umpisa na subong nga adlaw, Setyembre 20 tubtob sa Setyembre 30.
Ang tinutuyo sang programa ang agud mapromote ang local talents kag mapasundayag sa Bacolod Masskara Festival.
Ang kada grupo ang dapat may minimum nga pito kag maximum nga dose ka miyembro, sa bisan ano nga edad.
Ang mga grupo ang magalabay pa sa screening kag audition sa Oktobre 1, kun sa diin 10 ka grupo ang pilion nga magcompete sa finals nga patigayunon sa Oktobre 25, Biyernes sa Bacolod City Public Plaza.
May-ara lamang sa lima tubtob pito ka minutos nga alloted time kada performance kag may 1 point deduction kada 30 segundos nga paglapaw sa oras.
Ginadumilian naman ang mga delikado nga acrobatic stunts kag flying, apang ginapahanugutan lang ang back dive kag tumbling.
Ginadumilian man ang paggamit sang pyrotechnic gadgets, salakyan, paaso ukon mga combustible materials bilang props.
Ang paglapas sa guidelines ang sarang tunaan sang diskwalipikasyon.
P15,000 ang nagahulat para sa champion, P12,000 sa 1st runner up kag P10,000 ang 2nd runner up.
Ang pito ka iban pa ang makabatun man sang consolation prize nga P2,500 kada grupo.
