Kalakip sa mga balantayan nga mga aktibidad sa Bacolod City Public Plaza subong nga Masskara Festival 2023 ang Handog ng Bombo Radyo at Star FM sa Masskara Festival – Dance Showdown Competition sa Oktobre 20.
Sa interview sang Bombo Radyo Bacolod kay Christopher Mallo, site supervisor sa Bacolod City Public Plaza, madamo sang mga balantayan nga mga aktibidad sa nasambitan nga venue.
Kalakip na diri ang Masskara Young Sector sa Oktobre 14.
Ini ang isa ka advocacy-based beauty pageant, nga lain sa tradisyunal nga beauty pageants bangod ini ang indi tuhoy sa kagwapa ukon talent kundi natuhoy sa mga sectoral group activities.
Pinaagi sini, ginapakita ang mga kontribusyon sang tagsa ka sectoral group agud mangin Super City ang ciudad sang Bacolod.
May patigayunan man nga grand finals sang Bida ng Bacolod kun sa diin 10 nalang ang finalists gikan sa elimination round nga ginpatigayon sang Oktobre 8.
Ini ang ginalakipan sang nagkalain-lain nga mga talento kalakip na ang fire dancers kag mga maga-ambahon.
Sa Oktobre 17, patigayunon naman ang Drags and Divas, nga programa sang lesbian, gay, bisexual, transgender and queer (LGBTQ) community kasubong man ang Senior Medical Mission para sa mga senior citizens.
Sa Oktobre 18, balantayan man ang Mardi Gras Street Dance Competion.
Samtang mawitness naman ang world class performance sang 10 ka nanarisari nga dance groups gikan sa ciudad sang Bacolod kag probinsya sang Negros Occidental para sa Dance Showdown Competition nga Handog ng Bombo Radyo at Star FM sa Masskara Festival.
Madag-an sang mga contestants ang dalagkuan nga mga cash prizes kun sa diin ang Grand Champion ang makabatun sang P10,000, First Runner Up nga P8,000, Second Runner Up nga P5,000 kag ang mabilin nga pito ka grupo ang makabatun sang consolation prizes nga P2,000.
Magluwas sa mga ini, atun man masaksihan ang pagperform sang inyo paborito nga mga dramatista sa radyo, ang mga cast sang bantog Toyang Ermitanya.
Madamo man sang mga parlor games kag papremyo nga nagahulat sa mga tumalan-aw.
Suno kay Mallo ang mga aktibidad sa Bacolod City Public Plaza ang ginatawag sang mga ini nga Masskarapatdapat sa Plaza.
