Preparado na ang Danzakin nga dance group para sa pagpasakop sini sa Handog ng Bombo Radyo kag Star FM sa Masskara Festival – Dance Showdown Competition karon sa gab-i.
Sa interview sang Bombo Radyo kay Jmhel Tribo, ang choreographer sang grupo, ang ila grupo ginalakipan sang 15 ka miyembro kag ang mga ginatudluan sini lunsay tanan naga-eskwela ukon makaagi eskwela sa Negros Occidental High School.
Suno diri, iban sa mga miyembro ang nakagradwar na sa NOHS apang nagtinir sa gihapon sa Danzakin.
Pahayag ni Tribo, elementarya pa lamang ini mahilig na ini sa pagsaot kag sang ini nagtapak sa Third Year High School nag-umpisa na ini mangin isa ka choreographer.
Dugang pa sini, yara sa ila pamilya ang kahiligon sa pagsaot.
Dako man ang bulig sang Danzakin sa iya pag-eskwela, kun sa diin sang siya Grade 11 pa lamang, siya na mismo ang nagagasto sa iya pag-eskwela humalin sa tuition, projects kag school activities.
Samtang, aminado ang isa ka miyembro sang grupo nga mabudlay para sa iya ang pag-manage sang iya oras ilabi na nga naga-ekswela ini sa kolehiyo kag nagapractice sa pagsaot.
Sa interview sang Bombo Radyo kay Hiro Grey Guanzon, nagkuha ini sang kurso nga Bachelor of Physical Education (BPEd) bangod man sa kahiligon sini sa pagsaot.
Suno diri, ginapaigo-igo na lamang sini ang iya oras sa pag-eskwela kag pagpractice.
Nagatuon ini samtang yara pa sa eskwelahan kag matapos ang practice amo naman ang paghimo sini sang iya mga school activities.
Dako man ang bulig sang Danzakin kay Guanzon kun sa diin ang mga premyo nga ila nadag-an, ang iya ginadugang sa iya balon sa pag-eskwela.
SAMTANG….Bombo Radyo ang nangin rason kun ngaa natukod ang UGR Dancers nga grupo para makapasakop sa Handog ng Bombo Radyo kag Star FM sa Masskara Festival – Dance Showdown Competition.
Sa interview sang Bombo Radyo kay Joeminic Figueroa, ang founder kag manager sang UGR Dancers, bag-o gid lamang natukod ang ila grupo, ini matapos nga ila nabalitaan nga may yara sang dance showdown ang Bombo Radyo.
Suno diri, natukod sa Barangay Santo Nino sang Banwa sang EB Magalona ang grupo nga ginalakipan sang mga estudyante nga naga-eskwela sa Junior High School kag Senior High School.
Pahayag ni Joeminic, mabudlay para sa ila ang pagpractice bangod bag-o lang sila nga grupo kag apisar nga isa lang sila ka barangay ang iban sa ila ang nagapauli sa malayo nga Sitio.
Apang, nagpadayon sila bangod nakita man sini nga dedikado ang mga kabataan sa pagsaot
Samtang, suno naman sa 18 anyos nga bata ni Joeminic nga si Krestel Mae Figueroa, nga amo man ang choroegrapher sang UGR Dancers, ila ipakita sa dance Showdown ang kinalain sang ila grupo sa ila performance nga may magamay nga throwback sa mga madaan nga estilo sa pagsaot.
