Nagsugod na ang pagpatrolya sang mga kapulisan sa Handumanan Cemetery pila ka adlaw antes ang Nobyembre 1.
Sa interview sang Bombo Radyo Bacolod kay Police Captain Lelanie Lagoting, station commander sang Bacolod Police Station 10, sa paglibot sang mga kapulisan may yara na sang nagaplastar nga mga nagabaligya sang bulak kag kandila.
Suno kay Lagoting, may yara naman sang mga himata nga nagalimpyo sa lulubngan sang ila nga mga minatay.
Suno sa station commander bangud holiday ang fiesta minatay ginaabisuhan sini ang kada pamilya nga kun magbisita sa patyo sa ila minatay dapat siguruhon ang ila nga panimalay.
Ginapahanumduman man ang mga pumuluyo nga likawan ang magsuksok sang mga alahas.
Suno kay Lagoting dapat ang mga pumuluyo na mismo ang makahibalo mag-aligmat kag maghalong bangud sa ginalauman nga pagdagsa sang mga tawo sa Handumanan cemetery.
Dugang nga pahanumdom sang station commander sa mga motorista nga maghalong agud nga malikawan ang aksidente.
