Pila ka mga eskwelahan sa ciudad sang Bacolod ang nakabaton sang laptop nga ginbakal sang Department of Education sang tinalikdan nga tuig nga natukiban sang Commission on Audit nga overpriced kag outdated.
Sa interview sang Bombo Radyo kay Richard Gelangre, principal sang Bacolod City National High School, yara ini sa Handumanan National High School tinalikdan nga tuig kag sila ang nakabaton sang 40 ka units.
Ang laptop ang ila nga nabaton antes ang pagbukas sang SY 2022-2023 kag gilayon man nga ginpanagtag sa mga manunudlo.
Ang nagpirma sang receipt ang property custodian kag ini man ang nagpahulam sa mga manunudlo bangud wala man sang mga estudyante sa classroom.
Suno kay Gelangre, nalipay ang mga manunudlo nga may nabaton sila nga libre nga laptop apang makaligad ang isa ka semana, common na ang ila reklamo nga tuman kahinay ang pagrespond sang laptop.
Suno diri, blue ang color sang laptop nga ginbakal sang DepEd, Acer ang brand apang Intel Celeron ang processor sini gani tuman ini kahinay magstart, ilabi na gid kun madamo na ang unod nga applications.
Magluwas nga mahinay ang processor kag naga-lag ang system, may mga depekto pa ang iban nga laptop.
Suno kay Gelangre, start-up level ang processor sang laptop gani tuman kahinay ang pagrespond sini ilabi na nga madamo ang ginaubra sang manunudlo.
May naissue man nga unit kay Gelangre apang magluwas nga ini ang mahinay, may naguba naman sa keyboard.
