Ginsaylo na ang haya ni Msgr Felix Pasquin sa San Antonio Abad Church sa Barangay Singcang Airport, kun sa diin sini ginpili nga magretiro.
Madumduman nga una nga ginhaya ang bangkay sini sa Sacred Heart Seminary ukon Lupit Church sa Barangay 39.
Kaupod kay Msgr Pasquin, kaupod man nga ginsaylo sa San Antonio Abad Church ang haya ni Rev. Fr. Romeo Empestan.
Ini bangod ginapakamaayo na lamang nga upod ang haya sang duha ka pari nga malawig man nga nagkaupod sa Diocese of Bacolod.
Kadungan sini, madamo naman sang nagbisita sa simbahan agud maghatag sang ulihi nga pagtahod sa mga pari.
Sa interview sang Bombo Radyo Bacolod kay Alex Porras, 60 anyos, 2nd cousin ni Msgr Pasquin, ini ang naka-abot kahapon gikan sa Pototan, Iloilo.
Sila ang malapit gid sa isa kag isa humalin pa sang ini ang yara sa elementarya kag halos kada weekend ini ang yara man sa balay nanday Msgr Pasquin sadto.
Suno diri, relihiyoso katama ang iloy ni Msgr Pasquin, nga nangin training sini sa pagserbisyo sa Ginoo.
Gindumdom pa sini nga nagalahod lang sadto si Msgr Pasquin nga magpari gani ini ang nagkuha pa sang kurso nga medisina.
Apang ini ang masami nga nagamasakit kun magpadulong sa eskwelahan, apang sang nagdesisyon ini nga magsulod sa seminaryo, kaangay nga nagkaladula ang balatian.
Dugang pa ni Porras nga ang naka-engganyo gid kay Msgr Pasquin nga mangin pari, amo sang nabatian sini ang pahayag sang isa ka pari nga ang pagkapari ang katumbas sa pagrepresentar sa Ginoo.
Si Msgr Pasquin man ang nagaserbe nga liyabi sa ila pamilya para maghugpong, kag ini ang masami nga nagahatag sang mga laygay.
Suno kay Porras, madamo ini natun-an gikan kay Msgr Pasquin partikular na sa husto nga mga pangginawi.
Bilang bugtong nga bata, agud malingaw kaupod ni Msgr Pasuin ang duha sini ka ido, ang shitzu nga si chiki kag ang aspin nga napulot sang pari kag ginpangalanan sini nga si Lucky.
Suno kay Porras, kun may mga selebrasyon kaangay sang kaadlawan ukon annibersaryo, ginapadulungan gid sang ila pamilya si Msgr Pasquin agud ini ang indi masubuan.
Sila ang ulihi nga nagkaupod sang una nga semana sang Disyembre matapos napatay ang pakaisa ni Msgr Pasquin sa Pototan, Iloilo.
Sadto, medyo mahinay naman ini kun maglakat kay may-ara na sang alalay nga personal nurse.
Gindumdom pa sini ang pahayag ni Msgr Pasquin sa misa para sa kamatayon sang iya pakaisa nga sa ila pagtipon-tipon, nagakasadya naman ang ila himata nga yara na sa langit.
Aminado si Porras nga yara na sa linyada sang ila nga pamilya ang pagkadiabetic, kag si Msgr Pasquin ang naga-inject lamang sang insulin.
Sa pihak nga bahin, magluwas kay Msgr Pasquin nga natalana ilubong sa Enero 16, alas-2:00 sang hapon, sila ang may-ara pa sang tiya nga nagtaliwan man sa banwa sang EB Magalona, nga amo ang pinakaulihi nga tigulang sa ila pamilya.
Pasalig ni Porras nga ang legasiya ni Msgr Pasquin ang magapabilin sa ila, kag tinguhaan man sang mga ini nga mapabilin nga united ang ila pamilya, apisar nga wala na si Msgr Pasquin nga nagaserbe nila nga haligi.
