Nagpatigayon sang pila ka aktibidad ang Philippine Red Cross Negros Occidental – Bacolod City chapter may kaangtanan sa World Red Cross Day kag Red Crescent Day 2024.
Ang selebrasyon subong nga tuig ang may tema nga “everything we do comes from the heart”.
Suno kay Rizaldy Alunan Jr. focal person sang Red Cross Youth, sila ang nagpatigayon sang Health Caravan sa SM City Bacolod.
Kalakip sa gina-offer nga serbisyo ang vital checking, free consultation sa mga medical doctor volunteers, naghatag sang libre nga bulong kag free blood typing.
Magluwas diri, sila ang may blood letting activity man nga ginpatigayon sa Barangay Taculing, Bacolod City.
Nagpatigayon man sang information dissemination ang mga red cross volunteers sa mga eskwelahan, nga nagapalapta sang red cross movement.
Kalakip diri ang umpisa kag mga tawo sa likod sang isa sa ginakabig pinakadako nga humanitarian organization sa kalibutan.
Panindugan ni Alunan nga lain gid ang kalipay kun makabulig nga gikan sa tagipusuon.
Sa pihak sini ang Red Cross ang nagabulig man sa pagrasyon sang tubig sa nagkalainlain nga Barangay nga ginakulang sang water supply.
Sila ang nagdeploy man sang volunteers sa kabug-usan nga pagpatigayon sang Western Visayas Regional Atlethics Association (WVRAA) Meet 2024
Nagapasalamat man ang mga ini sa Bombo Radyo nga isa sa dako nila nga partner sa pagseguro sang supisyente nga supply sang dugo sa probinsya pinaagi sa ginapatigayon nga Dugong Bombo.
