Padayon nga ginamonitor ang kondisyon sang babayi nga lapsag nga nakita sa stepboard sang jeep nga nagabiyahe sa Talisay City sa Barangay Zone 8, Talisay City, Negros Occidental sang Doming sang gab-i.
Sa interview sang Bombo Radyo Bacolod kay Dionela Madrona, pinuno sang Talisay City Social Welfare and Development Office, ang baby girl ang padayon pa nga ginamonitor bangud santo sa pinakaulihi nga laboratory tests manubo ang hemoglobin sang lapsag.
Suno kay Madrona, madamo nga nadula nga dugo sa lapsag bangud sa pagdala diri sa Barangay sang una nga nakakita antes gintawgan sang rescue team agud gilayon nga madala sa Talisay City Heath Center, samtang indi man properly cut ang umbilical cord sang lapsag.
Dugang pa bangud nga naexpose sa tugnaw ang lapsag ini ang nakaeksperyensya man sang hypothermia.
Subong ang lapsag ang ginadapatan sang antibiotics paagi sa intramuscular.
Natalana man nga liwaton ang laboratory test sang lapsag agud nga tsekyaron ang kondisyon sang bata.
Suno kay Madrona, napreparar naman nila ang nagakaigo nga dokyumento para sa foundling case sang lapsag kag napablotter naman ini.
Suno diri ang ginikanan sang bata nga nagbilin sang lapsag agud makalikaw sa responsibilidad ang naglapas sa RA 7610 ukon Special Protection of Children Against Abuse, Exploitation and Discrimination Act,”.
Sa tion nga mag-ayo na ang kondisyon sang baby girl ang ibutang na ini sa DSWD accredited shelter sa ciudad sang Bacolod.
Madamo naman nagpahayag nga sila na ang maatinder sa bata apang may yara sang ginasunod nga guidelines ang DSWD santo sa layi.
Nagapanawagan man ini sa mga ginikanan sang lapsag nga makig-angot lamang sa ila kun ano ang desisyon nila sa lapsag.
Dugang pa nga panawagan ni Madrona sa publiko nga mangin responsable sang atun nga mga ginaubra agud malikawan ang unwanted pregnancies kag indi man magsuprer ang mga lapsag bangud sa pagkairesponsable sa hinimuan.
