Nagdangat sa 40 ka mga health facilities sa bilog nga pungsod ang nakaangkon sang partial damage bangod sa epekto sang Tropical Cyclone Carina kag Southwest Monsoon ukon Habagat.
Suno kay Department of Health (DOH) Assistant Secretary Albert Domingo, 18 diri ang barangay health stations, 14 ang ospital, pito ang rural health units, kag isa ka regional office sang DOH.
Paathag sini nga operational gihapon ang mga pasilidad apang naapektuhan sang mga pagbaha gani ginkinahanglan nga patigayon sang gamay nga evacuation, apang gilayon man nga nakabalik sa trabaho.
Sang Huwebes, ginreport ni DOH Secretary Ted Herbosa nga may 11 ka health facilities nga nakaangkon sang gamay nga kahalitan bangod sa malain nga paniyempo.
Apisar sini, gin-athag ni Domingo nga ang DOH ang padayun sa paghatag sang primary care services sa mga naapektuhan sang bagyo kag habagat.
Suno diri may napatigayon na nga 5,159 consultations para sa nagkalainlain nga health concerns sa mga evacuation centers.
Kalabanan diri ang mga common diseases kaangay sang ubo kag sip-on bangod yara sa evacuation conditions, kag may-ara man sang nagapangayo sang abiso natuhoy sa prophylaxis ukon panaming batok sa leptospirosis.
Una na nga ginpahayag ni Herbosa nga lauman ang pagsaka sang kaso sang leptospiroses sa masunod nga mga inadlaw bangod sa mabaskog nga mga pag-ulan nga nagresulta sa malala nga pagbaha sa pila ka bahin sang Luzon.
