Nagpanugyan ang Negros Occidental Provincial Health Office nga likawan ang palupok kag magkaon sang healthy foods sa pagselebrar sang New Year.
Sa karun, yara na sa code white ang tanan nga ospital sa pungsod santo sa mando sang Department of Health bilang preparasyon para sa selebrasyon sang bag-ong tuig.
Suno kay Negros Occidental Provincial Health Officer Dr. Girlie Pinongan, mahimo man nga makaselebrar sang bag-ong tuig nga wala sang palupok kag maggamit sang iban nga makapagahod nga gamit.
Suno diri, kun maggamit gid man sang palupok dapat nga bantayan ang kabataan kag maghalong nga indi makahalit sa iban.
Samtang, nagpanugyan man si Pinongan nga hagan-haganon ang pagkaon sang unhealthy foods para sa mabakod nga ikaayong lawas.
SAMTANG…. Naghatag sang pahanumdom ang Bacolod City Health Office tuhoy sa paghagan-hagan sang kaon sa palaabuton nga Bag-ong Tuig.
Sa interview sang Bombo Radyo Bacolod kay Dr. Grace Tan, head sang environment and sanitation division sang Bacolod City Health Office, indi malikawan nga madamo sang handaan sa kaangay nga mga okasyon, kag kaupod man sini ang masami pagpinagusto sa pagkaon.
Apang panugyan ni Tan nga mas maayo kun healthy nga pagkaon ang kaunon, ukon balance diet.
Dapat nga likawan ang mga pagkaon nga tuman ka damo sang calories ilabi na kun diabetic ukon matas ang risgo sa hypertension.
Kasubong man maghalong sa mga pagkaon nga malawig na nga naluto, kaangay sang mga handa sa Paskwa nga ginapalab-ot pa sa New year.
Paathag ni Tan nga ang pagkaon nga exposed sa hangin sang masobra duha ka oras ang mahimo na nga tapikan sang mga bacteria.
Kasubong man ang mga pagkaon nga madasig mapan-os kaangay sang mantikaon nga pagkaon ukon may cheese kaangay sang pasta.
Hagan-haganon man dapat ang pag-inom sang softdrink kag alcoholic drinks samtang mas maayo nga maghatag sang oras sa exercise.
Samtang sa mga may maintenance nga bulong, indi gid pagkalipatan ang pagtumar agud indi matrigger ang mga balatian kag kun hinali nga maglain ang pamatyag, mas maayo nga magpakonsulta na gilayon sa doktor kag indi na paghulaton pa nga maglala ang balatian.
