Isa sa mga ginatutukan sang Benitez Administration amo ang health program kalakip na ang natalana nga pagtukod sang Mini Hospitals ukon Super Health Centers sa mga Barangay.
Sa State of the City Address (SOCA) ni Bacolod City Mayor Alfredo “Albee” Benitez, ginpanindugan sini nga indi dapat matabo nga may Bacolodnon nga indi mahatagan sang Healthcare ukon Medical Treatment bangod sa wala sang downpayment ukon wala sang available nga hospital bed.
Agud ma-address ang problema, isa sa nangin centerpiece agenda ni Benitez sa iya nga pagkampanya ang nahanungod sa Bacolod Comprehensive Health Program (BacChip).
Sa karun may-ara na sang 6,517 nga mga BacChip holders kag target pa sang City Government nga maka-enroll sang dugang nga 70,000 ka mga household heads ukon katunga sang kabug-usan nga pamilya sa Bacolod City.
Tatlo naman ka mga private hospital ang nakapirma na sa memorandum of agreement sa pagbatun sang BacChip cards nga ginalakipan sang Bacolod Queen of Mercy Hospital, South Bacolod General Hospital and Medical Center kag Riverside Medical Center.
Nagdangat naman sa 91 ka mga card holders ang nabuligan na sa ila nga pagpa-ospital.
Apang wala sang mahimo bisan ang mga card holder, kun wala sang available bed sa ospital.
Agud madecongest ang major hospital, magatukod ang syudad sang Bacolod sang mga Mini Hospitals ukon Super Health Centers.
Ang mga proyekto ang igatukod sa Barangay 21, Alijis, Cabug, Mandalagan kag Vista Alegre, agud mas mapalapit ang serbisyo medical sa mga pumuluyo.
May-ara man sang Ultra Sound machines, operating room para sa mga minor surgeries kag ward beds kun sa diin ang syudad ang nag-alukar sang balor P135 million gikan sa Development Bank of the Philippines (DBP) loans.
Magluwas dira, gin-uprade man ang existing temporary Treatment and Monitoring Facility sa Barangay Vista Alegre kasubong man ang Midway Facility sa Barangay Alijis.
Samtang nagtalana man ang syudad sang P200 million para sa improvement sang City Health Complex.
Suno kay Benitez, ginapromote man nila ang doctor consultation pinaagi sa eKonsulta para sa mga minor health complaints.
Samtang tanan naman nga mga health centers sa syudad ang butangan sang Telemedicine para makapatigayon sang online consultation sa tagsa ka Barangay.
