Nag-file sang graft complaint sa Office of the Ombudsman ang isa ka grupo sang “concerned Department of Health personnel” batok kay Health Secretary Ted Herbosa kag 16 ka iban pa nga mga opisyales bangud sa gina-alegar pag-embezzle sang P1.4 billion nga balor sang mga bulong kag bakuna.
Sa 33 pages nga reklamo, gin-akusaran sang grupo ang tiglikom kag iban pa nga mga opisyales sang graft kag serious dishonesty, grave misconduct kag conduct prejudicial to public service bangud sa kapaslawan nga mapanagtag ang mga bulong nalakip na ang HIV antiretrovirals, psychiatric medications kag vaccines, nga ginpabay-an nga nadunot sa bodega.
Suno sa grupo, expired na ang P68 million nga balor sang medisina kalakip ang 1.2 million cycles sang family planning drugs kag psychiatric injectables, P1.3 bilyon nga balor sang wala na-deliver nga mga bakuna kag 1.6 milyon ka tableta sang HIV antiretrovirals.
Suno diri, ang kapaslawan sa paghimo sang ila trabaho amo isa ka “dereliction of duty” kag direkta nga paglapas sa public trust.
Base sa grupo, sa baylo nga ipatuman ang emergency distribution plan, gin-una sang DOH nga padasigon ang disposal sang mga bulong agud ma-liquidate ang stock kag matago ang ebidensya sa media scrutiny.
Angot diri, ginhingyo sang grupo sa Ombudsman nga ipaidalom gilayon si Herbosa kag ang iya co-respondents sa preventive suspension agud malikawan ang mga ini nga magpamahog sa mga testigo ukon mag-tamper sang mga ebidensya samtang nagapadayon ang imbestigasyon.
