Nagpasalig ang tagpamaba sa Bacolod City Police Office nga antes paman ginpahayag ni Philippine National Police (PNP) Chief Gen. Guillermo Eleazar ang heightened police visibility subong nga nag-umpisa na ang ber months, ginabuhat na ini sang BCPO humalin pa sang Hulyo.
Nahibaluan nga nagmando si Eleazar sa tanan nga Police Offices nga ipatuman ang ginapasanyog nga Police Visibility sa tagsa ka mga area of responsibility subong nga bulan tubtob sa katapusan sang tuig.
Suno kay P/Maj. Sherlock Gabana sang Hulyo palang sang mag-umpisa ang ginatawag tigkiriwi, nag-umpisa na ang heightened alert sang BCPO kun sa diin bisan ang mga Force Multipliers, Barangay Tanod kag Barangay Peacekeeping Action Team (BPAT) ang ginadugang naman sa Police Visibility sa tagsa ka mga barangay sa syudad sang Bacolod.
Paathag sini nga indi lang Police Visibility ang ila ginapatuman kundi Police Presence.
Suno kay Gabana, pinaagi sini indi lang basta nga makita ang mga kapulisan kundi mabatyagan mismo sang mga pumuluyo nga sila ang safe.
Nahibaluan nga sa ber months, masami nga nagaduging ang kinawatay.
Hugot ang pagbantay sang mga kapulisan agud nga malikawan nga matabo ang kaangay nga mga insidente.
Apang panugyan ni Gabana nga bisan naka-heightened alert ang mga kapulisan, indi man dapat magkumpyansa ang mga pumuluyo.
Dugang pa sini nga indi man dapat isalig tanan sang mga pumuluyo sa mga pulis ukon sa mga force multiplier ang ila seguridad kag kahilwayan kundi sila man mismo ang dapat mangin alerto sa palibot.
Paathag ni Gabana nga ang Crime Prevention ang indi lang obligasyon sang mga law enforcement agency kundi obligasyon sang tanan.
Gani panugyan sini nga dapat mag-ugyon ang tanan nga pumuluyo agud nga malikaw kag indi mabiktima sang mga kriminalidad.
Pahanumdom man ni Gabana, nga madamo na sa karun sang mga tawo sa mga dalanon, kag madamo man sang nagakatabo nga kinawatay.
Dugang pa sini nga indi lang ini nagakatabo sa mga dalanon, kasubong man sa jeep kag sa mga malls gani indi dapat magkumpyansa kag halongan gid ang mga pagkabutang.
