Ginabanta nga masobra P1 million nga balor sang kwarta ang gin-aligar nataban sang mga kawatan sa nagluntad nga pagpanghold-up sa warehouse sang isa ka courier company sa 11th Lacson St., Barangay 7, Bacolod City sang Biyernes sang gab-i.
Ginkilala ang mga biktima nga sanday Kate Karl Gestupa, 27 anyos, babayi kag residente sang Lumina Homes, Barangay Vista Alegre, Bacolod City kag si Recardo Timbad, 22 anyos, security guard, kag residente sang Hacienda Malaga, Barangay Robles, La Castellana, Negros Occidental.
Suno kay P/Capt. Jonito Pastrana, hepe sa Bacolod Police Station 2, ginsulod sang duha ka wala makilala nga mga suspetsado nga nagasuksok sang bonnet kag helmet, itom nga jocket kag nakadelargo ang warehouse sang J&T express kun sa diin gintayaan sang wala matumod nga armas ang security guard kag nagdeklarar sang hold-up.
Gin-agaw man sang isa ka suspek ang 9mm service firearm sang security guard samtang ang isa naman ang nagsulod sa establishmento kag ginkuha ang P1,100,000.00.
Matapos nga makuha ang kwarta, gilayon man nga nagpalagyo sa wala mahibaluan nga direction ang mga suspetsado.
Sa karun nagapadayon ang imbestigasyon sang mga kapulisan sa nasambit nga insidente.
