BACOLOD CITY-Gin-relieve sa pwesto ang hepe sang Bayawan City Police Station sa probinsya sang Negros Oriental kasunod sang insidente sang pinatyanay nga wala sang kasulbaran.
Mismo si Negros Oriental Police Provincial Office (NORPPO) Director Police Colonel Julian Entoma ang nag-rekomendar sa pag-relieve sa pwesto kay Lt. Colonel Alfonso Enrique nga sang nagligad lang nga Enero nagpungko sa pwesto.
Suno kay Entoma, ang bug-os kuntani nga 56 personnel ang gin-rekomendar niya nga ma-relieve sa pwesto apang ang hepe lang anay ang gin-aprubahan sang regional direktor.
Ginpahayag sang provincial director, nga naglab-ot ini sa nasambit nga punto bangud humalin lang sang Enero 2020, pito na ka kaso sang pinatyanay ang nagluntad sa ciudad sang Bayawan kag wala pa sang nasulbar diri kun sa diin ang pinakaulihi amo ang pagpatay kay Councilor Alex Tison, 66-anyos sang Brgy. Villareal tinalikdan nga Pebrero 18.
Magluwas diri suno kay Entoma, yara lang sa 30% ang crime solution kag crime efficiency sang nasambit nga Police Station.
Sa maabot nga Lunes, magapungko sa pwesto ang bag-o nga hepe sang Bayawan City Police Station nga si Lt. Colonel Jodimar Bonilla.
Samtang, ginkumpirmar ni Entoma nga nagtukod na sila sang Special Investigation Task Group (SITG) nga magatutok sa kaso sang ginpatay nga konsehal.
