Apat ang pilason kalakip na ang hepe sang Ilog Municipal Police Station matapos ang raid nga ginpatigayon batok sa iligal nga pagpanahor sa Barangay Dancalan, Ilog, Negros Occidental pasado alas-9:00 kagab-i.
Sa interview sang Bombo Radyo Bacolod kay P/Capt Judesses Catalogo, tagpamaba sa Negros Occidental Police Provincial Office, santo sa inisyal nga imbestigasyon, nakabatun sang reklamo ang Ilog Municipal Police Station natuhoy sa pagpatigayon sang panahor nga hantak sa lugar kapin alas-9:00 sang gab-i nga gilayon man nila nga ginpadulungan.
Agud matumod ang kamatuoran sang alegasyon, nag-upod mismo sa mga operatiba ang hepe nga si P/Capt Thursley Castillo.
Naabtan sang mga kapulisan ang kapin 30 ka indibidwal nga nagapusta sa hantak.
Gilayon naman nga nagpakilala ang mga kapulisan kag nagdeklarar sang raid kadungan sa pagpanakop sa mga nakigbahin sa iligal nga aktibidad.
Sa inisyal nga imbestigasyon, ginakaptan na ni Castillo ang tatlo ka mga suspetsado kag wala man ang mga ini sang resistance sang umpisa apang kadungan sang kinagamo, hinali nalang nga naghunos sang kutsilyo ang tatlo kag ginbululigan buno ang hepe.
Si Castillo ang nakaangkon sang pilas sa likod, kilid, siko kag tiil apang nahimo pa sini nga depensahan ang kaugalingon pinaagi sa paghunos sang iya service firearm.
Nahimo nga maigo sang hepe ang tatlo ka mga suspetsado kun sa diin sa karun ginamonitor pa ang medical bulletin sang duha samtang yara naman sa estable nga kondisyon ang isa pa.
Pasalig ni Catalogo nga estable naman sa karun ang kahimtangan sang hepe apang padayun pa nga ginabulong sa ospital.
Magluwas sa tatlo, yara naman sa karun sa kustodiya sang Ilog Municipal Police Station ang duha ka iban pa nga persona nga nagbulig man sa pagpuli sa hepe, nga natalana man nga pasakaan sang kaso.
Sa karun padayun pa nga ginahulat sang NOCPPO ang dugang nga update gikan sa Ilog Municipal Police Station may kaangtanan sa mga pilason suspetsado.
