Gina-respeto sang anay hepe sang Moises Padilla Municipal Police Station ang pag-relieve sa ila tanan kasunod sang pagbutang sa banwa sa idalum sang Comelec control kahapon.
Sa interview sang Bombo Radyo Bacolod kay Police Major Junjie Liba, matapos ang natabo nga pag-ambush sa convoy ni Vice Mayor Ella Celestina Garcia – Yulo sa diin napatay kanday councilor Michael Garcia kag anay punong barangay Mark Garcia, gin-lauman na sini nga iga-relieve sila tanan nga mga personnel sang nasambit nga police station.
Pagabuslan naman si Liba ni Police Major Adrian Acollador bilang bag-o nga hepe sang Moises Padilla Municipal Police Station.
Suno kay Liba, nakabaton siya sang impormasyon sa diin ini ang iya pa paga-kumpirmahon nga iga-haboy sila mobile force sa banwa sang Janiuay sa probinsya sang Iloilo kag sa probinsya sang Capiz.
Naga-apela man si Liba nga indi kuntani pag-butangan sang mga pumuluyo sa Moises Padilla sang malisya ang pag-assign sa ila sa iban nga lugar kasunod sang deklarasyon sang Comelec control.
Ginkasubo man sini bangud may yara sang iban nga naga-hambal nga ang pag-relieve sa ila ang isa ka penalidad bangud sa natabo nga pagpang-ambush.
Nag-depensa man si Liba nga patas ang ila pag-tratar sa duha ka grupo sa politika.
Ginhimo man nila sang insakto ang ila obligasyon bilang pulis apang suno kay Liba, ang natabo nga ambush ang wala ginlauman sang tanan kag wala sila sang sala agud kwestiyunon ang ila paghatag sang serbisyo sa banwa.
Apisar sini, gin-pabugal sa gihapon ni Liba ang tanan nga accomplishments nila bangud suno sa iya, sa 31 ka mga police stations sa probinsya sang Negros Occidental, sila ang may pinaka-gamay nga personnel sa diin 24 lang sila, apang nag-pangaduha sila sa gihapon nga gin-drug cleared kasunod sa banwa sang Pulupandan.
Kag sa pag-pungko man sini bilang hepe sa sulod sang anum ka bulan, madamo siya nga mga unsolved cases nga na solbar.
