Ginpahayag sang hepe sang Murcia Municipal Police Station nga ang ila banwa ang indi madamo sang krimen kag natabuan lamang nga nagdululungan ang indi maayo nga mga insidente sang nagliligad nga mga inadlaw.
Madumduman nga sini nga semana, tatlo ang napatay kag tatlo ang pilason sa rambol kag pagbun-anay nga nagluntad sa Handy’s Restobar, Hacienda Bernabe, Brgy. Salvacion samtang nasapwan naman ang isa ka bangkay nga nakasulod sa sako sa isa ka tamburong sa Barangay Damsite.
Sa interview sang Bombo Radyo kay Police Major Mark Joel Reclamado, hepe sang Murcia Municipal Police Station, nakaistoryahanay na sila ni Mayor Jerry Rojas kag maga-issue ang alkalde sang ordinansa sa mga restobars nga butangan sang security kag limitahan ang ila oras sang operasyon.
Rekomendasyon sang hepe nga magbutang sang dugang nga CCTV kag street light kag liwat nga i-activate ang pagroving sang mga barangay tanod.
Ginapropose man sini nga pauntaton na ang operasyon sang mga restobars pagka-alas 12:00 sang tungang-gab-i bangud wala sang municipal ordinance tuhoy diri.
Suno sa iya, ang kapulisan ang nagapatuman lamang sang layi kag kinahanglan sang ordinansa agud sila ang makahimo sang tikang tuhoy diri.
Ginatinguhaan man nila suno kay Reclamado nga mabatyagan sang mga pumuluyo nga sila ang safe apisar sang mga nagakatabo kag ginaubra ang ila masarangan agud mangin hilway sa krimen ang komunidad.
