Aminado ang hepe sang Silay City Police Station nga indi pa matumod ang mga suspetsado nga nagpangawat sa jewelry kiosk sa Gaisano Grand Mall sa ciudad sang Pebrero 16 kun sa diin P9.8 million nga balor sang mga alahas ang ila nataban.
Suno kay Police Lt. Col. Mark Anthony Darroca, hepe sang Silay City Police Station, nakita sa CCTV nga naglabay ang mga suspetsado apang indi ini klaro bangud madulom.
Tatlo tanan ang mga suspetsado nga nagsulod sa mall kag base sa ila nga panghulag, lunsay mga lalaki ang mga ini.
Nagsulod ang mga ini ala-1:14 sang kaagahon kag naggwa pasado alas-3:00 sang kaagahon.
Ang mga nataban nga alahas ang ginalakipan sang kulintas, pendant, singsing, aritos kag bracelet kag ini ang nagabalor sang P9.8 million.
Suno kay Darroca, indi pa matumod kun sanday sin-o ang mga suspetsado bangud indi klaro ang ila nawong.
Sa initial nga imbestigasyon sang mga pulis, nakita nga nagsulod ang mga suspetsado sa mall paagi sa paghimo sang buho sa dingding sa grocery nga nahamtang sa tupad sang bakante nga lote.
Sang yara na sa sulod, ginguba sang mga suspetsado ang roll up door sang grocery store kag nagdiretso sa Yung Luck kiosk nga ginapanag-iyahan ni Junie Diam, ila nga ginbuksan ang vault kag gintaban ang mga alahas.
