Gin-athag sang hepe sang Victorias City Police Station nga wala sang natabo nga pagmaoy sang isa ka police personnel sang Domingo sang gab-i.
Ini ang kasunod sang report nga may pulis nga nagmaoy sa Victorias City kag nagpinalupok sang armas.
Sa interview sang Bombo Radyo Bacolod kay Police Lt. Col. Eduardo Corpuz, ginpahayag sini nga ginsugo sang police ang anak sini nga 21 anyos nga pahigaron ang armas sini bangud nagapreparar sila sang pag-inum-inum kaupod ang pamilya kadungan sang selebrasyon sang Valentine’s Day kag aksidente naman nga naglupok ang .9MM caliber pistol nga service firearm sang police.
Maswerte man nga paibabaw ang paglupok sang armas kag wala man sang naigo.
Ginkompirmar man sini nga nag-away ang police kag asawa sini pagkatapos sang insidente kag indi man hubog ang police.
Nagpanindugan naman ni si Corpuz nga wala nagmaoy ang police.
