Ginpahayag ni Department of Health (DOH) Secretary Francisco Duque III, sa pagsugilanon nila ni Bacolod City Mayor Evelio “Bing” Leonardia nga gin-islan na ang “Herd Immunity” nga vaccination status sang isa ka lugar, kag karun ginatawag na ini nga “Population Protection”.
Madumduman nga kahapon ginpatigayon ang launching sang Resbakuna sa Botika sa Ayala Capitol Central kun sa diin nagpanguna sa programa sanday DOH Secretary Francisco Duque III, Vaccine Czar Chief Implementer Carlito Galvez kag Deputy Vaccine Czar Vince Dizon kapartner sa programa ang mga botika partikular na ang Mercury Drug Store nga magabulig sa gobyerno kag mangin venue sa vaccination programs.
Suno kay Leonardia, ang pagbisita sang tatlo ka opisyal ang nagapakita lang nga seryoso ang mga ini sa vaccination program.
Sa pihak nga bahin, gindayaw man ni Duque ang syudad matapos nga maglapaw na sa 70 percent nga target para sa herd immunity.
Nahibaluan nga nagdangat na sa 136 porsyento gikan sa 70 posyento sang target ang nabakunahan ukon 91 porsyento sang kabug-usan nga populasyon sa syudad sang Bacolod.
Suno kay Leonardia, ang Bacolod City ang makabig isa sa mga local government unit (LGU) sa Western Visayas nga may pinakamataas nga vaccination rate.
Ang madasig nga vaccination roll-out kag ang pagbisita sang tatlo ka mga opisyales sang National Government sa syudad ang makabig naman nga inspirasyon sang mga ini ilabi na nga sang mag-umpisa ang COVID-19 pandemic, ginalauman nga isa tubtob duha ka tuig pa antes makahuman sang bakuna.
Apisar sina, wala pa isa ka tuig, nakahuman na sang nanarisari nga brand sang COVID-19 vaccines kag madasig ang nangin roll-out sa kumunidad.
Sa karun nga nalapawan na sang syudad ang 70 porsyento sang target population, ginpamangkot man ni Leonardia kay Duque kahapon kun mahimo na nga kilalahon ang syudad nga nagdangat na sa “Herd Immunity”.
Apang suno kay Duque, ginkakas sa karun ang classification nga Herd Immunity kag gin-silan sang “Population Protection”.
