Kapin 15 porsyento nalang ang nabilin mahimo na nga malab-ot sang syudad sang Bacolod ang herd immunity.
Suno kay Em Legaspi Ang, Executive Director sa Bacolod Emergency Operation Center (EOC), ila na nga nakita ang relasyon sang pagbakuna sa paglatun sang COVID-19 bangod sa pagtaas sang vaccination number sang syudad, kadungan man nga nagpanaog ang COVID-19 cases.
Suno kay Ang, ang vaccination number sa syudad ang madasig nga nagsaka sa nakaligad nga duha ka semana ilabi na nga ginapatigayon na ang house to house vaccination kag ginabuhat man ini purok-purok.
Bangod sini, halos 15 porsyento nalang ang nabilin gikan sa target population nga masobra 60,000 nalang kag mahimo na nga malab-ot sang Bacolod City ang herd immunity.
Kun pagbasehan naman ang daily vaccination, nagadangat sa 3,000 tubtob 4,000 na ang nagakabakunahan kada adlaw kag kun ini ang magapadayun, mahimo nga malab-ot na ang herd immunity antes matapos ang bulan sang Nobyembre.
Nahibaluan nga masobra 630,000 ang kabug-usan nga populasyon sang syudad kun sa diin masobra 424,900 diri ang 70 porsyento.
Kasunod sang pagnubo sang kaso, ginapalamaayo man sini nga nagnubo na ang COVID deaths sa syudad kag madamo na sang mga bakante sa ospital.
Pila sa mga isolation facility ang ginsarado naman bangod wala na sang pasyente.
Apang aminado si Ang nga ini ang magadepende gihapon sa pagpahanugot sang mga Bacolodnon nga magpabakuna.
Bangod sini, ginahikutar sang City Government ang mga indi magpabakuna kasubong man ang mga nagapangduhaduha agud nga mapaathagan.
Aminado ini nga ini ang challege para sa ila agud nga maseguro nga antes ang paskwa ukon antes magtakop ang tuig, hilway na ang syudad sa virus.
Pasalig man sini nga madamo sang supply sang bakuna sa syudad.
Ginahingyo nalang sang mga ini ang pagkooperar sang mga unvaccinated pa nga mga Bacolodnon agud malab-ot ang herd immunity.
Samtang kasunod sa paglab-ot sang herd immunity, ginalantaw ni Ang nga ang masunod na diri amo ang Booster Shot.
Mangin benepisyo naman sini amo ang pagpahalog sang restriksyon kag pag-amat amat balik sang mga trabaho agud makarecover na ang ekonomiya.
Sa tion nga magbalik na sa regular nga operasyon ang mga negosyo, magahatag man ini sang employment opportunity sa madamo.
