BACOLOD CITY-Nagsulat si Olympic silver medalist kag Asian Games gold medalist Hidilyn Diaz sa chairman sang Philippine Sports Commission agud ipabutyag ang iya sentimyento sa sitwasyon sang weightlifting sa pungsod kun sa diin naulamid ang pangalan ni anay Bacolod City Mayor Monico Puentevella.
Sa sulat nga napetsahan Setyembre 21, ginpabutyag ni Diaz ang iya kasubo nga sila mismo nga mga atleta ang nagaantos sa wala niya nauyunan nga sistema sa Philippine Weightlifting Association sa diin si Puentevella ang presidente.
Ginakabig ni Diaz nga depressing ang paggamit sang isa ka sports leader sa weightlifting nga wala sang promotion kag expansion sang sports, wala sang strategic plan, wala sang long-term program para sa mga atleta kag wala sang integridad.
Suno kay Diaz, nagatuga lang sang kapahamakan sa weightlifting si Puentevella sa baylo nga itib-ong niya ang paghugpong kag paghili-usa.
Ginduso man sang Olympian nga kuntani boluntaryo nga himuon ni Puentevella kun ano ang husto niya nga himuon.
Magluwas diri, ginaduso man ni Diaz nga kuntani naglabay sa husto nga election process ang anay alkalde kun luyag gid man sini nga mangin presidente sang PWA.
Dismayado man ang Asian Games gold medalist nga matapos ang iya kadalag-an sa 2016 Olympic Games, may pila ka mga persona nga naggamit sa weightlifting para sa ila bentaha kag indi sa bentaha sang sports kag sang mga atleta.
Suno diri, dapat nga mauntat na ini nga sistema bangud sila ang mga biktima.
Ginahulat pa ang sabat ni Puentevella may kaangtanan sa isyu.
