Nagapati bala kamo nga may higante nga talimbabaga nga makit-an diri sa probinsya sang Negros Occidental.
Ang kalabaon sini ang nagalab-ot sa siyam ka pulgada kag may kadakoon kaangay sa duha ka tudlo sang tawo.
Ini ang ginakakulbaan sang mga hikers nga maengkwentro sa kagulangan sa probinsya bangod sa risgo sini kun mangagat.
Suno sa hiker nga si Paolo Oliveros, makit-an ang mga dalagko nga talimbabaga sa Negros kag sila ang mas aktibo kun gab-i kag naga-istar sa idalum sang mga bato.
Apang sa karun tumalagsahon na lang malab-ot sang talimbabaga ang ila husto nga kadakuon bangod madamo sang pagpamahog sa ila kag sa ila gina-istaran.
Ang talimbabaga nga nakit-an ang mas matambok pa sa mga tudlo sang tawo kag may kalabaon nga walo ka pulgada ukon kaangay sang kalabaon sang isa ka straw.
Samtang nagalibot sa kagulangan sa probinsya, may nakita man sila nga isa ka Tarantula kag Philippine Pit Viper nga lunsay mga delikado nga sapat apang sa karun wala pa man sang may narekord nga napatay bangod sa venom sang mga ini.
Suno kay Dr. Nielsen Donato, magulu-aligmat sa gina-agyan kag kun makakita man sang amo nga mga sapat, indi ini paghikapon samtang nangin malipayon man ini nga makita personal ang higante nga talimbabaga nga may yara man sang dako nga papel sa kalibutan.
